Nakatutok na ang Department of Health o DOH sa sitwasyon sa mga ospital na apektado ng malakas na magnitude 6.9 na lindol na tumama sa Davao del Sur at naramdaman sa iba’t ibang panig ng Mindanao kahapon.
Ayon kay Health Undersecretary Myrna Cabotaje, nagpapatuloy ang ginagawang assessment at validation ng DOH kung saan kinukumpleto nila ang listahan ng mga ospital at iba pang pasilidad na napinsala dahil sa lindol.
Pero sa inisyal na ulat na nakarating sa DOH, sinabi ni Cabotaje na nagkaroon ng minor damages sa Malungon Rural Health Unit sa Saranggani.
Mayroon ding naiulat na mga pasyente na inilabas mula sa Davao del Sur Provincial Hospital, na ngayon ay nananatili muna sa ilang tents.
Ayon kay Cabotaje, isa rin sa mga prayoridad ng DOH ay ang mga pasyente, lalo na ang mga buntis o mga ina na nanganak at kanilang mga sanggol, mga nakatatanda at mga may mabigat na karamdaman.
Tiniyak din ng opisyal na handa ang DOH na tumulong sa mga nabiktima ng lindol.
