Sarangani Province–Mismong si Department of Health Secretary Francisco Duque III ang nanguna sa nahitabo kagahapon, Lunes, nga inauguration og turnover ceremony sa Mega Drug Rehabilitation Center sa Rehiyon Dose nahimutang sa Kawas, Alabel Sarangani Province.
Kauban ni DOH Secretary Duque sila DOH Assistant Secretary Abdullah Dumama, Department of Budget and Management DBM Undersecretary Herman Jumella, DILG Undersecretary Epimaco Densing, DOH Region 12 Director Aristides Tan, og ang mga kadagkuan sa Chinese Government, lakip na ang labing dako nga Chinese contractor nga maoy paspas nagpatindog sa maong drug rehabilitation center imbes may kontrata kini nga baynte-uno (21) ka bulan ang gihuman lang kini nila sulod sa siyam (9) ka bulan.
Wala usab palampasa ni Secretary Duque ang pagdayig ngadto kang Governor Steve Chingbian Solon nga iyang gihulagway ang gobernador nga usa ka “man of action” og “man of vision.” Si Governor Solon matud pa ang nagpausab sa Sarangani tungod kay giila na karon ang Sarangani Province nga “one of the highest performing provinces in Mindanao.”
Masugdan ang operasyon sa Sarangani Regional Drug Rehabilitation Center sa musunod nga tuig 2019 pagadumalahan sa DOH. Prayoridad nga makasulod kadtong dili na kayang dawaton sa community-based drug rehab, apil na kadtong na-adik napud sa pag-inum og ilimnong makahubog. Kumpleto kini sa tanang pasilidad, gipondohan og P350 Milyones ka pesos sa nasud China. Ang Provincial Government sa Sarangani ang nipalit sa tulo (3) ka ektaryang luna.
