Nakita sa DOH nga nag-unang rason karon sa pagsaka sa ihap sa maong balatian sa Region XI mao ang sayop nga pagpondo og tubig sa mga kabalayan ug komunidad.
Sumala kang Dr. Marie Cris Modequillo, National Aedes Borne Viral Disease Prevention and Control Program Manager sa DOH Davao sa usa ka presscon nga bisan pa man sa normal nga pagpondo og tubig, mamahimo gihapon kining pangitlogan og lamok.
Tungod niini, giawhag ang publiko nga dili paabton og usa ka semana ang pinondo nga tubig. Mas maayong limpyuhan ang butanganan aron nga mawala sab ang itlog nga anaa sa tubig.
Kahinumduman nga gikumpirma sa Southern Philippines Medical Center (SPMC) nga sa milabay nga bulan sa Marso hangtod karong Abril, ikaduha ang dengue sa mga nag-unang admission sa ospital.
Kanunay pahinumdom sab ngadto sa katawhan nga sundon ang 5s strategy o ang search and destroy mosquito breeding sites, self-protection o paggamit og insect repellents, seek early consultation sa pinakaduol nga health care facility, support fogging, spraying, and misting sa hot spot areas ug sustain hydration.
RadyoMaN Ivy Parido
