Sa impormasyong gipadala sa DXDC RMN Davao gikan kang Police Major Jun Bautista, ang hepe sa Panabo City Police Station, giila ang mga biktima nga mao sila Oldarico Guisongan, 55 anyos ug Napoleon Caresosa, 53 anyos.
Sa imbestigasyon, nasayrang ayha nahitabo ang krimen, namanday lamang ang duha sa usa ka tindahan apan kalit lang mibutho ang riding in tandem ug sa walay pagduha-duha gipamusil ang mga biktima.
Dead on the spot si Guisongan human gipusil sa makadaghang higayon samtang si Caresosa, misuway pa og dagan pagawas apan naapsan gihapon kini sa mga suspetsado ug nakabsan usab sa kinabuhi.
Gani hilabihan ang kasubo sa mga pamilya sa mga nakalas ug sumala pa sa kabanay sa usa sa mga biktima nga si Mesay nga dili unta pakatulgon sa konsensya ug karma ang nagbuhat sa maong krimen.
Sa karon, sumala pa ni PMaj. Bautista nga ila ng gipalawman ang imbestigasyon aron masuta ang motibo sa krimen ingon man aron madakpan ang nakasibat nga riding in tandem.
RadyoMaN Ivy Parido
