Gisiguro sa Department of Labor and Employement kon DOLE nga nakatutok sila sa problema sa mga empleyado sa Valencia Rubbertex, Inc. nga nahimutang sa KM4, Casisang, Valencia City.
Una nang nagpahigayon ug strike ang mga empleyado sa VRI sugod kaniadtong adlaw nga Miyerkules tungod sa mga benepisyo nga wala nahatag sa mga kompanya ngadto kanila.
Sa interview sa RMN Malaybalay ngadto kang Bobby Panilag, ang presidente sa ALU-TUCP gibutyag niini nga apil sa ilang demanda mao ang paghatag ug benepisyo ngadto kanila ug tungod usab sa dili makatarunganong suhulan nga gihatag sa mao nga kompanya sa ilaha maoy hinungdan nga naghimo sila ug strike atubangan sa VRI.
Samtang sa interview sa RMN Malaybalay ngadto kang Labor Undersecretary Joel Maglungsod, gibutyag niini nga nakamonitor sila sa gihimong strike sa mao nga mga empleyado.
Matud ni Maglunsod nga layo kaayo ang demand sa mga trabahante ug layo usab proposal sa management.
Giklaro usab niini nga katungod kini sa mga trabahante.
Una nang gipahayag ni Panilag nga dili sila mu-undang sa pagpahigayon ug strike hangtod dili ihatag sa VRI ang ilang mga demanda.
Nasayran nga mukabat ngadto sa 181 ka miyembro ug miduyog sa ilang gihimo nga kalihukan.
Gisiguro usab sa DOLE nga ilang gimonitor ang kalambuan sa mao nga negosasyon tali sa mga trabahante ug kompanya.
Ang VRI gipanag-iyahan sa usa ka Japanese national.
