Atol sa press conference, gipasabot ni Joel Penido, Resource Center Head, nga ilahang ginasigurong ma-check ang mga donasyon ilabi na ang mga pagkaon, diin adunay mga dili na pwedeng ihatag sa mga apektadong residente.
“Kung dili nato imaniobra pag-ayo, kung dili nato i-check ang mga i-donate o gikan sa mga donors, dili nato mahibal-an nga naa diay expired ba. Mao na atong mga consequences, experience,” saysay ni Penido.
Matud ni Penido, nanghinobra na ang ilahang mga donasyon sama sa ukay-ukay, de lata, kape, hygiene kits, ug uban pa. Matud niya, mas maayo kung bugas ug preskong pagkaon ang ilahang itunol nga maoy magamit sa evacuees. Aduna usay mobile kitchen ug wala ginatugotan nga magluto ang bakwit aron malikayan ang insidente sa sunog.
“Unsa ang gikinahanglan nato: gulay, isda ug bugas nga maoy importante kaayo nga maoy iga-feed sa atong mga tawo, kay wala ta kabalo hangtud karon, maabtan ta og March 15,” segun ni Penido.
Sa pagkakaron, gatusan ka pamilya ang anaa pa sa mga eskwelahan sa Mawab samtang ginatukod pa ang temporary shelters sa residente ug pagplastar sa ilang permanenteng kabalhinan o relocation site.
RadyoMaN Kirby Manzon
