Sugod karong adlawng Lunes bag-o na ang hepe sa Cebu City Police Office kon CCPO , human napupos na ang duha ka tuig nga termino ni CCPO Chief Sr. Supt. Joel Doria.
Si Doria, hulipan ni Senior Supt. Royina Garma nga maoy kasamtangang hepe sa Criminal Investigation and Detection Group-7 kon CIDG-7.
Kahinumduman nga si Doria nahimong multi-awarded nga hepe sa CCPO ,diin kini gipasidunggan sa MetroBank Foundation, isip Best Senior Police Officer tungod sa talagsaon nga programa niini nga mao ang Oplan Pokemon , ug karong bag-o gipasidunggan sa PNP tungod sa iyang kampanya batuk sa iligal nga drugas.
Karong Hulyo 2 , mao ang paglingkod na ni Sr Supt. Garma isip bag-ong hepe sa CCPO.
Si Garma maoy labing unang babaye nga mangulo sa kapolisan sa dakbayan sa Sugbo.
Samtang sa pagkakaron si Doria magsilbi una sa Police Regional Office-7.
