Patay nang nakit-an ang usa ka dos anyos nga batang lalaki sulod sa laton nga dunay tubig sa usa ka boarding house sa San Vicente, Tagoloan, Misamis Oriental mga alas 7:20 kapin kon kulang kagabie.
Matud ni Police Corporal Jacky Nalagamba sa Tagoloan police Women and Child Protection Desk o WCPD nga adunay usa Jessa Flor ang nakakita sa maong bata sulod sa laton sa dihang mokuha unta kini og tubig aron manghugas.
Sa initial nga imbestigasyon nga ilang nahipos gikabutyag ni Police Corporal Nalagamba nga dunay foul play ang maong panghitabo tungod kay naka U shape ang porma sa maong bata sulod sa laton.
Dugang pa niini, nga mga alas sais kapin kon kulang kagabie ulahing nakita ang maong bata gawas sa ilang panimalay nga gibana-banang 100 meters ang kalay-on sa crime scene.
Sa pagkakaron padayon pang gi-imbestigahan sa Tagoloan Police ang maong panghitabo aron matumbok ang responsable sa pagpatay sa maong bata nga unang gitoohang nalumos.
Samtang, ang patayng lawas sa maong dos anyos nga batang lalaki gihaya na sa ilang panimalay ug wala pa naka desisyon ang ginikinan kung ila ba kining ipa autopsy.
