Sulu- Ya confirma el commandante del Joint Task Force Sulu Bgen Cirilito Sobejana que ya puede sila recubri con dos maga Indonesian kidnap victims endenantes alas 6:30 del aga na barangay Bunot , Indanan Sulu.
Si Sobejana ya habla que abordo na un Tamaraw FX el dos maga Indon victima identificao como canda Saparuddin Koni y si Sawal Maryam cuando ya puede canila columbra el maga militar.
Ensiguidas ya lleva con el dos nuevo librao victima na Kuta Heneral Teodulfo Bautista Station Hospital por el examinacion medical y esperansao ay pone con estos bajo na custodial debriefing que ay conduci na mismo headquarters del Joint Task Force Sulu na Brgy Busbus, Jolo, Sulu.
Asegun con Sobejana, antes ya puede recubri con dos maga victima ya tiene pa el encuentro na Talipao Sulu entre el maga bandido y militar que donde ya resulta na muerte del sinco maga miembros del ASG (base na body count) y el recubrida del 3 alta calibre armas de fuego , mientras sinco maga soldao tambien el ya sale irido.
Accordando cay con canda Koni y Maryam ya abducta el maga Abusayyaf del pasao anyo huntu con otro sinco maga Indonesian nationals na Sabah Malaysia.
