Davao City – Nadiskobrehan sa Philippine Drug Enforcement Region (PDEA-XI) nga usa ka drug den ang balay sa high value target (HVT) kinsa ilang target sa buy-bust operation didto sa may Purok 3, Brgy. Madaum, Tagum City, Davao del Norte niadtong Lunes.
Sumala ni PDEA-XI Director Antonio Rivera nga ang suspek nga si Tungkoh Abdul Rahman Salidad Sugbo, 26 anyos, kinsa napalitan sa agent sa PDEA og usa ka gramo sa giingong shabu nga nagkantidad og P8,000.
Atol sa anti-drug operation sulod gisuspetsahang ‘drug den’, naaresto usab sila si Jerson Cañalita, Rey Campo, Eric John Demigaya, Ali Lor, Jerome Onong, Randy De Gracia, Yasim Lisondra, Noel Imbal, Walter Abugan, Archie Polegrates ug Julius Estopil.
“It turned out nga pagkadakop sa iyaha (Sugbo) naay mga laing tao didto sa balay nga manuyupay so nahulog nga nahimong drug den to ang iyang balay ug giapil namo tong mga anaa didto sa sulod,” matud ni Rivera.
Ang 10 gramos nga siyam ka pakete sa mga giingong shabu nagkantidad og P150,000 narekober gikan sa posisyon ni Sugbo ug Onong lakip na mga assorted drug paraphernalia ug marked money.
“Out of 11 nga atong nadakpan aside kang Tungkoh unom ang nag-positive sa drugtest,” sumala ni Rivera.
Apan gihimakak ni Sugbo nga siya gapayuhot og iligal nga droga.
“Gagamit ko pero dili ko gapamiligya,” matud sa suspek.
Sumala sa suspek dili niya kaila ang lain pang mga dinakpan gawas lamang ni Archie Polegrates.
Kasong may kalapasan sa R.A. 9165 kun Dangerous Drugs Act of 2002 ang atubangon sa mga drug suspects.
RadyoMaN Aimee Guinita
