Davao City – Ang wala nituman sa ‘safety standards’ nga mga Public Utility Jeepneys (PUJs) ang wagtangon sa Department of Transportation (DOTr) diha sa kadalanan.
Sa interbyu kang DOTr Assistant Secretary Elvira Medina sa programang ‘Straight to the Point’, gibutyag niini nga wala silay nakita nga PUJs sa pagkakaron nga nihaom kabahin sa ilang ‘safety standards’.
Giklaro ni Medina nga subay sa Transport Modernization Program, gikinahanglan nga ang entrance sa mga pampublikong sakyanan anaa na sa ‘road sides’ kun ‘pedestrian walk sides’ ug aduna dapat klase-klaseng safety equipment sulod sa ilang mga sakyanan.
Segun usab sa maong opisyal nga sugdan na ang PUJ modernization ug laumang aduna nay mga units nga ipagawas karong bulan sa Enero.
Gitino ni Medina nga angayang masabtan nga ang modernisasyon dili lamang phaseout sa mga peligrosong mga yunit kon dili ang pagpangita’g mas maayong alternatibong mode of public transportation sama sa mga upgraded units ingon man mga bus units nga pwedeng molawig sa nanag-unang kadalanan sama sa gilaraw nga High-Priority Bus System dinhi sa syudad sa Davao.
RadyoMaN Jason Amisola
