Ginpasalig ni Engr. Julius Abela, Chief sang Construction Section sang DPWH 1st Engineering District nga magapahamtang sila sang dugang nga traffic signs Arnaldo Blvd. padulong sa People’s Park, Baybay, Roxas City kag sa kalapit nga area matapos ang sunod sunod na nga aksidente sa amo nga lugar.
Suno pa diri nga may yara na sila sang ginpahamtang nga rumble strips malapit sa amo nga accident prone area sa People’s Park apang may mga driver kag riding in public sa gihapon nga indi makabatyag sini bangud yara sa impluwensiya sang makahulubog nga ilimnon.
Ginpahayag dugang ni Abela nga nagpahamtang naman sila sang reflectorized nga road markings kapareho sang “slow down” apang wala ginasunod sang mga drivers sa tion nga yara na ang mga ini nagapalapit sa mga intersections nga isa sa mga ginahalinan sang disgrasya.
Ginpasalamatan man sini ang Roxas City Government nga nagpahamtang sang dugang nga mga suga sa nasambit nga duog agud nga maghatag sang dugang nga kapawa sa mga motorista.
Sa madumduman nga duha ka sunod-sunod nga aksidente salakyan ang nagluntad sa People’s Park nga gintunaan sang kamatayon sang lima ka mga persona.
