General Santos City–Anaa na sa siyam ang ihap sa mga pasyente sa covid facility sa Dr. Jorge P. Royeca Hospital human madugangan ang naunang pito ka mga pasyente.
Sumala kang Dr. Ryan Aplicador, Hospital Chief sa Dr. Jorge P. Royeca Hospital nga higayon nga adunay surge sa kaso sa covid 19 dungan sa pasko ug bag-ong tuig, andam sila.
Sa karon, adunay 42 ka mga covid bed sa covid facility ug adunay laing 25 ka mga bed sa ward higayon nga kulangon. Nauna na matud pa silang gimanduan ni Gensan City Mayor Ronnel Rivera ug DOH nga dapat mangandam alang sa unsa mang posibilidad nga pagsaka sa kaso sa covid.
Dugang pamahayag ni Dr. Aplicador nga ilaha ng gilauman ang posibleng pagsaka sa kaso sa covid gumikan sa pagsugod pa lang sa bulan sa Disyembre, ubay-ubay ang mga okasyon ug nisaka gyud ang kaso sa unang duha ka semana sa bulan.
Pag-angkon niya nga dili gyud malikayan ang mga panagtapok hilabina nga nahimo na kining tradisyon sa mga pinoy panahon sa pasko ug bag-ong tuig.
Busa awhag niya nga pabilin gihapon nga tumanon ang minimum health protocol gumikan sila sa medical sektor ang dili kayang ipa-ubos ang kaso sa covid gumikan magdepende kini sa disiplina sa matag usa.
Kalabot niini, gibutyag ni Dr. Aplicador nga wala silay nakit-ang hinungdan sa subling pagsaka sa aktibong kaso sa covid 19 kundili ang mga nahitabong panagtapok sa katawhan.
Sila matud pa sa Dr. Jorge P. Royeca Hospital ang igo lang sa pagdawat sa mga pasyenteng positbo sa covid nga adunay sintomas.
Sa kasamtangan, ang siyam nga pasyente nga anaa sa ilahang pasiliad ang samang anaa sa moderate case lakip na ang usa ka tuig nga batang lalaki nga positibo sa covid 19.
