Davao City – Laumang mas makapahinam ug nindot ang duha ka adlaw nga Dragon Boat Festival competition karong tuiga kun itandi sa milabay’ng tuig.
Kini ang gipaniguro ni Clarise Calolot, event organizer sa Kadayawan Dragon Boat Festival 2019, diin matud niya pulos club teams ug walay military group ang niapil karong tuiga sama sa PNP Maritime nga nag champion sa milabay’ng tuig.
Sa pagkakaron duna nay 706 participants gikan sa 21 ka mga grupo ang nakaparehistro na diin kini gikan pa sa mga lugar sa Quezon, Boracay, Surigao, Cagayan, Iligan, walo ka grupo sa Davao City lakip na ang usa ka private sector ug school-based nga grupo.
Saysay ni Calolot nga dunay duha ka kategoriya ang tigi-an sa mga partisipante particular ang Big Category nga dunay 20 ka mga paddlers ug Small Category nga dunay 10 ka paddlers.
P50,000 ang madawat sa winning team sa Big Category, P30,000 sa First Runner-Up, ug P20,000 sa Second Runner-Up, samtang P20,000 ang masakmit sa winning team sa Small Category, P10,000 sa First Runner-Up, ug P5,000 sa Second Runner-Up.
Dugang sa event organizer nga mas daghan ang niapil karong tuiga kun itandi sa 547 ka mga partisipante sa tuig 2018.
Sa Agosto 10, 2019 ang unang adlaw sa Dragon Boat Competition diin mahinayon nang 400-meter race ug sa Agosto 11, 2019 ang 200-meter sprints mahitabo sa Sta. Ana Wharf sugod alas-5:00 sa kabuntagon.
RadyoMaN Jason Amisola
