Matud ni DPWH XI Spokesperson Dean Ortiz, wala nila gipasagdan makumpleto ug mahuman ang drainage project sa Bajada ug sa JP Laurel, hinuon, nasabtan niini ang ang epekto sa mga negosyo nga anaa sa palibot.
Gipasabot ni Ortiz ang rason nganong hangtud karon wala pa gihapon mahuman ang drainage system project sa kilid sa Abreeza Mall kini tungod mas gi-una og human ang drainage sa may dalang Veloso nga nagkonekta sa open canal sa dalang Dacudao ning dakbayan.
Dugang batbat pa sa opisyal, ang tubig gikan sa drainage sa JP Laurel, Bajada, ug bisan sa dalang Sarenas didto dunggo tanan sa kanal sa dalang Veloso isip outlet hinungdan nga gi-una og human ang drainage sa maong dapit.
Segun pa sa tigpamaba, gilayon isunod og trabaho sa contractor ang drainage project sa kilid sa Abreeza ugaling mahuman sa dili madugay ang drainage system sa dalang Veloso.
Ug kon makumpleto na ang tanang drainage system project hayan masulbad na ang mga pagbaha masinati sa maong mga dapit panahon magbundak ang uwan sa dakbayan.
Sa karon, nakig-alayon na ang DPWH XI sa contractor nga magbutang og dugang warning devices aron malikayan ang disgrasya sama sa nahitabo sa lalake nga nahulog sa kanal nga nagviral karon sa social media.
RadyoMaN Joel Viray
