RMN LAOAG – Natay ti dua a pasahero ti maysa nga SUV kalpasan a naaksidente iti National highway iti Brgy. 25 Pragata Pasuquin, Ilocos Norte.
Nakaturog ti driver a ni Novelito Abaya y Miguel, 52, residente ti Brgy. Cullalabo, Burgos, Isabela.
Iti report ti PNP Pasuquin, bayat a dumaldalyasat daytoy iti nasao a lugar, nakaturog ni Abaya ket ditoy a naawanan ti control ti manobela ket nadungpar iti poste ti kuryente – deretso a nagbalbaliktad daytoy aginggana iti kataltalonan.
Nabigbig dagiti pimmusay isuda; Edmundo Martillano ken Josephine Moises agpapada nga agnanaed idiay Isabela.
Nasugatan met dagiti dadduma pay a pasahero isuda; Elizabeth Bucag, maysa a Barangay Treasurer; SK Chairman Junard Salacup, ken Eduardo Domingo Jr, maysa a Barangay Kagawad.
Agatendar kuma dagitoy a pasahero iti maysa a convention iti siudad ti Laoag.
Agtultuloy ti imbestigasyon ti PNP mainaeg ti aksidente. Posible met a sumango ti darum a ‘Reckless Imprudence resulting in Homicide’.
Bernard Ver, RMN News
