Drayber sa sakyanan nga nakabangga og single motor nga gikamatay sa duha ka sakay niini, gikatahong lango sa ilimnong makahubog

Gituohang lango sumala pa sa ilimnong makahubog ang drayber sa usa ka sakyanan kinsa mibangga sa usa ka single motor nga gikamatay sa duha ka mga babaeng sakay niini pasado ala una sa kadlawon kagahapon didto sa Balangay 6, Poblacion, Quezon, Bukidnon.

Sa interview sa RMN Malaybalay ngadto kang Corporal Eugene Tanate, Traffic Investigator sa Quezon Municipal Police Station, gibutyag niya nga lango sa ilimnong makahubog ang drayber sa usa ka Mitsubishi Jeep hinungdan nga nabanggaan niini ang maong single motor.

Dead-on-the-spot sumala pa ang mga biktima sa maong aksidente.

Temporaryo sumala pang nakakustodiya sa Quezon Municipal Police Station ang drayber sa nakabanggang mini jeep human ang aksidente apan nakagawas ra human ang amicable settlement tali sa duha ka kampo.

Panghimangnu karon sa kapulisan sa lungsod sa Quezon ilabi na sa mga drayber nga magmabinantayon sa kadalanan aron nga mahilikay sa mga disgrasya.

Gapahigayon na usab og mga seminar ang mga kapulisan ilabi na ngadto sa mga kabarangayan sa mga angayan nga buhaton ilabi na og mag drive.

Gikinahanglan matud pa nga magsuot og helmet og mag drive, anaa lang sa minimum speed ug likayan ang pagmanehu nga naka-inom.

Sagad na matud pa karon ang mga disgrasya maong gikinahanglan ang pagdoble amping sa kadalanan.