Ivisan, Capiz – Patay ang 43- anyos nga driver sang isa ka tanker truck samtang ini ang naggamit sang banyo sa isa ka poluy-an sa Barangay Mianay, banwa sang Ivisan.
Gin-respondehan pa sang mga katapo sang rescue team sang MDRRMO – Ivisan kag gindala sa Rural Health Unit ang biktima nga ginkilala kay Joseph Castete, residente sang Leganes, Iloilo apang ini ang gindeklarar nga dead-on-arrival.
Nahibaluan nga base sa impormasyon, halin sa Iloilo ang nasambitan nga biktima sang maglain ang pamatyagan sini kabangdanan nga nagpundo sa national highway malapit sa poluy-an nanday Rosemarie Compuesto agud kuntani nga maggamit sang banyo.
Makaligad ang pila ka minuto, nakabati na lamang ang mga ini sang lagubo kag sang ginpadulongan ang lugar, diri nakit-an ang lawas sang biktima nga natumba na kag wala sang pangalibutan.
Ginapatihan nga gin-atake sa tagipusuon ang biktima kabangdanan sang iya kamatayon.
