Dead on arrival sa ospital ang driver sang motorsiklo sa nagluntad nga disgrasya sa dalanon sa Prk. Bulak, Brgy. Paraiso, Koronadal City , alas 11:30 sang aga sang Agosto 28, 2021.
Imbolbado sa nasambit nga insidente ang Kawasaki Bajaj CT 100 motorcycle, ginamaneho ni Renante Montilla Montemor, kag residente sang Prk. Katipunan, Brgy. Reyes, Banga, South Cotabato kag isa kaToyota Hilux, ginamaneho ni Honorio Belonio Torre Jr, 52 years old kag residente sang Prk. Ycon, Brgy. GPS, Koronadal City.
Sa imbestigasyon ang duha ka mga salakyan ang nagasubay sa pareho nga direksyon padulong sa banwa sang Banga, apang pag-abot sa nasambit nga lugar ang motorsiklo nga yara sa second lane ang gulpi nga nagliko sa wala , rason nga nabungguan sa likod nga bahin sang Hilux nga yara sa inner lane .
May-angot sini, natumba sa sementado nga dalan ang motorsiklo kabangdanan nga nakaangkon sang seryoso nga pilas sa mga nagkalain-lain nga parte sang iya nga lawas ang driver sang motorsiklo nga gindala pa sa ospital, apang gindeklarar nga patay sang attending physician.
Gilayon naman nga ginkustodiya sa Koronadal CPS traffic section ang duha ka mga salakyan nga pareho nakaangkon sang danyos.
