BAGO CITY, NEGROS OCCIDENTAL 4th Update) – May ginalantaw na karon nga person of interest ang mga katapo sang Bago City PNP sa kamatayon ni Dr. Felix Valenzuela.
Suno sa hepe sang Bago PNP nga si Police C/Insp. Joeffer Cabural, sa interview sang DYHB nga may ginasundan na sila nga suspek sa krimen kon diin may ginpang-imbitar na sila nga mga tawo.
Ginpahayag ni Cabural nga sa mga tawo nga ila ginpang-imbitar, may isa gid diri nga indi mag-atubang sa ila kag nagapanago.
Gin-confirm sang hepe nga apesar ginahulat pa ang official result sang autopsy, apang base sa initial result, si Dr. Valenzuela ang nag-angkon sang 13 tanan ka igo sang pagbuno gamit ang ice pick, tanan sa iya dughan.
Pahayag ni Cabural nga sandig sa ila imbestigasyon base sa pahayag sang mga nakakita, makatatlo ka beses nga nagpundo-pundo ang salakyan kag sa ikatatlo nga bes, may nagpanaug nga maniwang kag naga-kalo nga lalaki halin sa passenger seat kag ginlantaw ang goma antes nga naglakat palayo sa salakyan.
Indi man malayo ang posibilidad, suno kay Cabural nga halin pa lang sa Bacolod ginpatay na ang biktima kag ginbilin lang sa dalanon sang Calumanggan, ukon along the way, amo ang pagpatay sang suspek kay Dr. Valenzuela.
Sa pihak nga bahin, ginadula man sang police ang anggulo nga robbery ukon hold-up ang natabo bangud intact ukon ara gihapon sa sulod sang salakyan ni Valenzuela ang iya wallet, kwarta kag iban pa nga mga importante nga kagamitan.
Base sa pahayag sang mga pamilya ni Dr. Valenzuela, ini siya ang naghalin sa isa ka mall sa Mandalagan kag nag withdraw pa gid sang kwarta sa isa ka bangko.
