ILOILO City – Todo ang pagdayaw kag pagpasalamat ni Novie Joy Balete Venteroso, Licensed Professional Teacher sa driver sang Light of Glory Taxi nga nagbulig sa iya sa pagtahi sa iya natastas nga pants sang padulong na siya kuntani sa Iloilo Convention Center (ICon) para sa oath-taking ceremony sang mga bag-o nakapasar sa board nga mga manunudlo.
Suno kay Novie Joy, ginbuligan siya sang driver pangita sang tiyangge agud magbakal sang hilo kag dagum agud tahion ang natastas niya nga pantalon.
Ini bangod wala na sila sang makita nga patahian bangod Domingo kag halos sarado ang mga nahibaluan nila nga patahian.
Alang-alang naman para sa iya kon magpauli pa siya kag mag-ilis.
“Naghapit si manong sa tyangge lapit na tani sa ICC,samtang gabakal pa si Manong,dali2 ko man uba akon pants kg magpanabon sang akon blazer. Pagbalik nya may dala na sya hilo kg dagom,ginatry na pa tanog sang hilo sa dagom pero gapanic naman to si Manong guro kagina kay ako daan daw mahibi nga daw makadlaw nga daw indi maintindihan. Jusko!” ang kabahin sa post ni Novie Joy.
Aminado ini nga bisan sastre ang iya iloy, indi siya makahibalo magpanahi.
Hugot sa buot naman nga ginbuligan siya snag driver sa diin mismo ang driver amo ang nagtahi sang iya natastas nga pantalon.
“Ginpark ni Manong ang taxi sa higad dalan para tahion ang pants ko.Gin offer nya man sakon ang extra shirt nya para pangtabon ko. Syet! Sana all,kabalo manahi😂😂😅 In fairness kay Manong nami siya magtahi.
Sa isip ko ya kagina bahala na color lavender ang hilo maski blue akon pants basta matahi lang kag makaattend ko ya oath-taking.”
Wala na makuha ni Novie Joy ang kumpleto nga ngalan sang driver apang iya naman ini nakuhaan sang laragway.
“Abi ko malas na gid ko kagina,pero tungod sa kindness nga ginpakita mo sakon Manong,swerte gid ko japun. Feeling ko isa ka sa mga alagad ni Lord,nanaog sa duta para magbulig sa mga tawo pareho sakon.Tuod gid man nga kung may challenges ka nga ma experience,mahatag man si Lord sang way para ma solve ini kag si manong driver ang instrument Niya para mabuligan ako..Wala gd Siya gapabaya❤ Thank you soooo much Manong.Saludo gid ko sa tanan nga taxi drivers,lalo na sa imo Manong! May God bless you!!!” ang kabahin sang post ni Novie Joy sa iya Facebook account.
(c) Novie Joy Balete Venteroso
