Malaybalay City, Bukidnon – Lauman nga sa Oktubre pa magsugod ang Land Transportation Office kon LTO Northern Mindanao sa pag-apod-apod ug mga plastic drivers license nga adunay 5 years validity.
Sa interview sa RMN Malaybalay ngadto kang LTO 10 Regional Director Oscar Salcedo, gibutyag niini nga gisugdan ang pag-apod-apod sa mao nga lisensiya didto sa National Capital Region ug laumang maabot ang machine nga gamiton niini sa rehiyon 10 sa katapusang semana sa Setyembre ug makasugod na sila ug release sa bulan sa Oktubre.
Gipahayag ni Salcedo nga muabot ug 10 ngadto sa 15 minutos ang pagprint sa kada lisensiya.
Lauman matud pa nga makahuman sila ug 60,000 ka adlaw aron ma-isyu ang backlog nga mga lisensiya sa rehiyon.
Giklaro usab sa regional director nga ning kasamtangan, papel pa ang ilang ihatag sa mga mukuha ug mo-renew sa ilang lisensiya.
