General Santos City–Ang paglambigit sa iligal nga droga ang nag-unang anggulo nga gitan-aw karon sa Police Station 6 nga motibo sa nahitabong pagpamusil patay sa usa ka Rolando Navarete II, 24 anyos nga taga Carcon Vill., Barangay Lagao, Gensan , alas 6:00 ang takna sa gabie niadtong adlawng Lunes.
Sumala pa ni Police Major Tirsu Pascual, ang hepe sa Police Station 6 nga ang nasangpit nga biktima ang kanhi nang natukhang tungod sa paglambigit niini sa droga ug anaa man usab kini sa listahan sa kapulisan kaniadto nga nagapamaligya ug iligal nga droga.
Sa karon padayon pa nga ginasuta sa kapulisan ang mga identity sa mga suspect nga mipusil sa nahisgutang biktima kung asa basi sa nakuha nga impormasyon sa kapulisan posible matud pa nga kauban ra sa nasampit sa pag pamaligya ug droga mipusil kaniya.
Dugang pa ni pascual nga posible matud pang nagka-unsihay sa droga ang hinungdan sa maong pagpamusil o dili ba kaha napasanginlan ang biktima nga asset sa kapulisan hinungdan nga gitumba sa iyang kakaubanan.
Samtang gikumperma man usab ni Major Pascual nga nakadawat sad sila ug impormasyon nga naglambigit usab ang biktima sa mga pagpangawat ug pagpanulis sa ilahang area of responsibility apan padayon pa nilang gina-validate ang maong impormasyon.(Dave Silagan)
