General Santos City – Droga ang usa sa mga ginasundan nga motibo sa Polomolok Police Station kabahin na sa pag pamusil patay sa usa ka Ian Gayam, 37 anyos, walay trabaho ug residente sa Mahusay Subdivision Poblacion Polomolok South Cotabato.
Nasayran nga nakit-an sa posisyon sa nasangpit nga biktima ang gituohang shabu kansa naputos sa foil sa sigarilyo. Sumala pa ni PSI Romeo Albano ang labaw sa investigation section sa Polomolok PNP nga migawas sa ilang imbistigasyon nga gisundan na ang biktima sa mga suspect nga nakasakay sa motorsiklo nga kolor itom ug walay plate number.
Pauli na unta kini sa ilahang panimalay ug sa dihang naka timing nga nag-inusara kini, gilayong gipabuthan sa mga suspek sa makalimang higayun nga miresulta sa kamatayon niini.
Nasayran nga sunod sunod na ang mga kasong pagpamusil sa Polomolok, ug gani kaganina laing biktima sa pagpamusil patay ang naitala, kung asa empleyado sa Polomolok Water District ang pinakauwaheng biktima sa pagpamusil patay.
