Davao City- Gilaraw karon sa Public Safety and Security Command Center ang pagpasa og usa ka ordinansa nga magkontrola kun mag-regulate sa paggamit og drone dinhi sa dakbayan sa Davao.
Gipasabot ni PSSCC head Ret Gen. Benito De Leon nga gumikan sa kasayon sa pagpalit niini diha sa merkado, pweding mabutang sa delikado ang seguridad sa syudad kung dili awtorisado ang usa ka indibidwal sa pag-operate niini.
Gisaysay ni De Leon nga sa laing nasud gigamit na ang mga drones sa surveillance sa mga kriminal aron mabantayan ang mga lihok sa pulis samtang adunay laing insidente diin ang drone didto na ikabit ang mga bomba o ammunations.
Kahinumduman nga sa krisis sa Marawi City gigamit sa Maute Group ang drones diha sa ilang terroristic activities.
Dugang ni De Leon nga importante nga makontrola ang paggamit sa drone pinaagi sa pag-require nga aduna gayuy prior authorization ang gustong magpalupad niini.
Makigkoordinar ang PSSCC ngadto sa Civil Aviation Authority of the Philippines (CAAP) kalabot sa gikasugyot nga drone regulation ordinance.
Kasamang Aimee Guinita
