Ha pinag usa nga pwersa han Municipal Drug Enforcement Unit han Palo Leyte, PDEA Region 8 ngan Leyte Police Provincial Office, arestado durante han Buy bust operation an usa nga drug dealer ha Brgy. Candahug Palo Leyte.
Base hiton report tikang ha Palo Police Station, ginkilala an suspek nga hi Larry Bagasino Gadiano, 32 anyos, may asawa, ngan residente ha Brgy. 62 Old Road Sagkahan, Tacloban City.
Subay hiton impormasyon, naaktuhan han Poseur buyer han PNP nga nagbabaligya hin gin aaligar iligal nga droga an suspek. Napalit tikang kan Gadiano an usa ka heat sealed transparent sachet han gin aaligar shabu. Dida han nakorner na han mga otoridad nakuha pa tikang ha possession han suspek an upat (4) pa ka sachet han gin tutuuhan shabu. Narikupo liwat an kinyentos pesos (P500.00) kumo marked money ngan usa nga cellphone.
Ha pagka yana in paslak na an suspek ha Palo Police Station ngan papasakahan hin kaso han pagtalapas han Section 5 Sale and Trading of illegal drugs han RA 9165.
