Davao City – Gisabwag ni Police Regional Office 11 Director Chief Superintendent Marcelo Morales ang iyang gibating kadismaya gumikan sa pagkalambigit sa mga menor-de-edad sa iligal nga droga.
Gipabuhagay ni Director Morales ang iyang pagbati human nasayran nga pipila sa mga nadakpan sa drug operations sa kapulisan mao ang mga menor-de-edad diin ang uban mga estudyante pa.
Sama na lamang sa ka estudyante nga si alyas Tee Jay kinsa lakip nasikop sa drug operation sa Barangay Tibal-og, Sto.Tomas, Davao Del Norte kagabii uban sa usa ka beautician.
Aminado si Morales nga bantang kaayo ang mga menor-de-edad sa iligal nga droga hilabi pa nga dili sila mapasakaan og kaso butang gihimong bangag sa mga sindikato aron gamiton sa ilegal nga kalihukan.
Aron masanta ug masalbar ang mga batan-on gikan sa kalambigitan sa droga gilaraw karon sa opisyal ang paglusad og Drug Prevention Education Campaign sa mga tulonghaan.
Katuyoan niini mao nga aron ipasabot ngadto sa mga estudyante nga wala sila’y maayo nga kaugmaong gikan sa pagpamaligya ug makadaot pa gyod kini sa ilang kalawasan.
RadyoMaN Joel Viray
