General Santos City–Nahagbong sa kamot sa kapolisan ang tigpayuhot og iligal nga droga atol sa gilusad nga anti-drug entrapment operation sa Police Station 6 kaganinang buntag sa may Alunan Block 4, Barangay Bula ning siyudad.
Giila ni Police Major Tirso Pascual, hepe sa Police Station 6 ang suspek nga si Saidali Labay Binasin alyas Sonny Boy, 42 anyos og nagpuyo sa maong lugar.
Subay sa report sa kapulisan nga nagpahigayon ug operasyon, bangag pa sa iligal nga droga ang suspek dihang ilahang nadakpan.
Gikumperma usab ni Major Pascual nga anaa sa drug watchlist ang suspek nga si Sonny Boy ug dugay nang gipangita.
Sa operasyon sulod sa gipuy-an sa suspek nagkatag pa ang napulo na gipang-repack niining pakete sa shabu. Narekober usab gikan sa suspek ang 500 pesos nga marked money og napalit nga gamayng pakete sa iligal nga shabu.
Sa bana-bana sa kapulisan nagkantidad ug 25 mil pesos ang shabu nga nakumpiska gikan sa suspek.
Tubag usab sa suspek nga si Sonny Boy, Myerkules sa gabie pa kini siya niabot sa Gensan gikan og Marawi City. Giangkon usab sa suspek nga nakagamit kinig shabu anang Myerkules sa gabie og Huwebes sa buntag.
Suspek ang gikatakdang mag-atubang ug kasong pagsupak sa RA 9165 o Comprehensive Dangerous Drugs act of 2002.
