Dipolog City – Nasikop sa Philippine Drug Enforcement Agency kon (PDEA-9) uban ang City Drug Enforcement Team sa Dipolog PNP sa pagpanguna ni PSI Alexis Bahunsua ang usa ka gikatahapang drug pusher pasado alas 7:10 kagahapon sa buntag human gikasa ang drug buy bust operation sa Barangay Barra ning dakbayan sa Dipolog.
Subay sa report sa PDEA-9, naila ang ilang dinakpan nga usa ka Jemar Ruelo Casalta, 32 anyos, usa ka ulitawo residente sa Barangay Turno ning dakbayan.
Atol sa operation, napalitan sumala pa ang dinakpan og usa ka medium sachet sa gituohang shabu sa kantidad nga P500.00 pesos.
Nakuhaan sab kini ug upat pa ka mga small sachet og usa ka big sachet sa gituohang shabu, nga dunay estimated market value nga 4,500 mil ka pesos.
Lakip nakuha gikan sa possession sa suspek ang buy bust money, improvised lighter kolor green ug 700 pesos nga kwarta, usa ka unit nga honda xrm motorcycle kolor itom nga gituohang gigamit sa illegal nga kalihukan.
Ang dinakpan balhug na sa detention cell sa Dipolog City Police Station ug gihikay na ang kasong kalapasan sa Republic Act No. 9165 kon The Comprehensive Dangerous Drugs Act of 2002.
Sumala pa sa taga PDEA-9 nga kanhi nang napriso ang dinakpan gumikan sa pagkalambigit sa droga apan human makagawas kaniadto sa bilangoan nibalik gihapon kini sa illegal nga kalihukan.
