Davao City – Bag-o kini nga ideya nga ipailawom sa random drug examination and tanang mga junior ug senior secondary students apan walay nakitang dautan ang katawhan ning naasoyng aksyon sa education department sa Pilipinas.
Sa interview sa buntagong programang ‘Straight to the Point’ sa topikong ‘Random Drug Tests,’ gisugilon ni Dr. Christopher Ryan Maboloc, faculty sa Philosophy sa premier Ateneo de Davao University nga kumpirmasyon kini sa dakung importansya sa ubang sektor diha sa malampusong pagbuntog sa mangtas nga droga.
Matud ni Maboloc, walay angay kabalak-an ang mga batan-ong tinun-an sanglit aduna may pasalig ang Department of Education (DepEd) nga tahuron sa mga awtoridad ang ‘right to privacy and confidentiality’ sa mga estudyanteng maapil unya sa random drug tests ingon man ang mamahimong resulta niini.
Ang panahum ug panglantaw sa propesor giubanan usab sa mabagang du-ot sa listeners kinsa nagkanayon mas maayo gani nga sa sayo ug linghud pa lamang nga panuigon, masilsil na sa ilang alimpatakan ang peligro mugna ning dautang bisyo.
Una niini, gipasalig mismo ni Education Sec. Leonor Briones nga dili tumong sa maong kampanya ang pagpaka-ulaw sa mga batan-on labi na nga dili kini maparehas sa kontrobersyal nga ‘Tokhang’ operations sa atong nasudnong kapulisan.
Kasamang June Duterte
