Nangayo ug depensa ang Department of Social Welfare and Development kon DSWD Region 10 ngadto sa mga senior citizens sa lungsod sa San Fernando ug Kalilangan ning probinsya sa Bukidnon kalabot sa na-delayed nga paghatag sa ilang unconditional cash transfer program alang sa tuig 2018.
Sa interview sa RMN Malaybalay ngadto kang Daisy Ramos, ang focal person sa social pension sa DSWD Northern Mindanao gibutyag niini nga gisiguro niya nga anaa ra ang kwarta ug lauman nga sa sunod bulan madawat na ngadto sa mga senior citizen.
Nasayran nga anaa sa 2,400 pesos ang dawaton unta sa mga senior citizen kaniadtong tuig 2018 apan hangtod karon wala pa kini na-release tungod kay nagback out ang Land Bank of the Philippines tungod sa isyu sa seguridad.
Sa karon matud ni Ramos nga adunay gihimo nga conduit nga nagpasabot dili na mangunay ang LBP sa pag-apod-apod sa mao nga kwarta kon dili ipaagi na sa third party.
Apektado sa mao nga delayed nga release ang anaa sa halos 2,000 ka mga senior citizen sa mao nga lungsod.
Nanghinaut usab si Ramos nga posibleng sa bulan sa Pebrero na kini ma –release.
Nidepensa usab siya sa pagtoo sa pipila nga nagamit ang kwarta maong na-delayed ang pagrelease. Sigun niini maski peso wala silay nahuptan sa mao nga kantidad.
Gihupay usab sa DSWD ang kabalaka sa maong mga senior citizen sa pag-ingon nga anaa ra kwarta ug gihulatan na lamang kung kinsa ang makadaug sa bidding.
Nasayran nga ang UCT tabang sa gobyerno ngadto sa mga senior citizen tungod sa pagtaas sa mga palaliton epekto sa gipatuman train law.
Ihatag kini sulod sa tulo ka tuig, diin ang unang hugna sa tuig 2018 diin makadawat ang matag kwalipikadong senior citizen sa tag 2,400 samtang 3,600 pesos ang ilang madawat karong tuiga hangtod sa 2020.
