Liwat nga gin-athag sang Department of Social Welfare and development ukon DSWD nga wala sila sang sin-o man nga kandidato nga gina-endorso ukon ginasuportahan sa 2019 elections.
Ini ang nasaad sa ginpaguwa nga advisory sang ahensya kasunod sang nakita nila nga political advertisement sang isa ka kandidato sa probinsya sang iloilo nga may isa ka babaye nga nagasuksok sang T-shirt nga may logo sang DSWD.
Gin-athag ni DSWD Regional Director Evelyn Macapobre nga indi nila empleyado kag indi konektado sa ahensya ang babaye nga makit-an sa nasambit nga political ad.
Ginpanindugan ni Macapobre nga nagapabilin nga apolitical kag non-partisan ang DSWD kag wala sang pahanugot sa ila ang paggamit sang logo sang ahensya sa TV advertisement.
Ginpahanumdum man ni Macapobre sa mga pumuluyo ilabi na sa mga miyembro sang 4 P’s ukon Pantawid Pamilyang Pilipino Program nga indi magpadala-dala sa pamahog sang mga politiko nga makakas sila sa Programa kon indi magsuporta sa mga ini.
Ginhatagan pagtamod ni Macapobre nga ang DSWD gid lamang ang mahimo makakakas sa listahan sang 4 P’s kag wala sang poder ang sin-o man nga politiko.
