Davao City – Nagpahimangno ang Department of Social Welfare and Development (DSWD) Field Office XI sa publiko ilabina sa mga benepesyaryo sa Pantawid Pamilyang Pilipino Program (4Ps) batok sa mga epal nga mga pulitiko o mga kandidato karon nga taliabot na ang piniliay.
Sa interbyu sa RMN Davao kan DSWD XI Regional Director Mercedita Jabagat nga aduna silay mando gikan sa kauluhan nga dili gayod magimbita o tugotang makapangampanya ang mga kandidato atol sa mga Pantawid Pamilya payout.
Gibatbat ni Jabagat nga walay katungod ang mga kandidato nga makataktak sa mga membro sa 4Ps busa dili angay nga mahadlok kung hulgaon sila.
“Wala man gyuy politicians or anybody nga makapatanggal except DSWD sa mga beneficiaries, kung non-compliant sila or naa silay mga na-violate nga mga palisiya sa DSWD sa programa that’s the time nga matanggal sila,” matud ni Jabagat.
Direktiba ni Jabagat sa mga parent leaders sa 4PS nga dili pahimuslan ang ilang gahum diha sa ilahang mga membro kung aduna silay suportaan nga mga pulitiko.
“Dili nila gamiton ang power nila pagka lider nga musukwahi sa pamaagi o palisiya sa DSWD ilabina sa Pantawid,” sumala ni Jabagat.
Hugot usab sila nga mag-monitor ug mag-supervise sa tanang mga sakop sa Pantawid Pamilya.
Gidasig sa ahensya ang katawhan nga mag-igmat ug ireport kanila ang mga epal nga kandidato ug mamahimo nila kining ipadangat ang ilahang reklamo sa Grievance Text Hotline 0918-912-2813 o i-message ang Facebook account sa DSWD Region XI o direktang mubisita sa DSWD Regional Office o Pantawid Municipal o City Link.
RadyoMaN Aimee Guinita
