Padayon ang pagpangrelease sang Department of Social Welfare and Development (DSWD 12) sang financial assistance sa mga kwalipikado nga waitlisted recipients sa mga remote areas sa rehiyon sang Social Amelioration Program.
Ginpahayag ni DSWD 12 Regional Director Cezario Joel Espejo nga yara sa 144,364 ka mga mga pamilya sa rehiyon nga mas labi nga naapektuhan sang COVID-19 pandemic ang makabaton sang nasambit nga emergency subsidy assistance.
Ang listahan ang base naman sa ginsubmitir nga rekomendayon halin sa mga local government units (LGUs) nga ginverify naman sang DSWD kag ang nasambit nga mga beneficiaries suno kay Director Espejo ang yara sa Geographically Isolated and Disadvantaged Areas (GIDA) nga wala nakabaton sang SAP cash assistance sang Mayo.
May-angot sini, nagalab-ot na sa P93 million pesos ang narelease sang ahensya sa 18,719 families sa sulod sang duha ka semana nga distribution.
Paklaro pa ni Espejo nga indi ini second tranche sang SAP, kundi para sa mga kwalipikado nga SAP beneficiaries nga wala sadto nahatagan sang ayuda kag base naman sa pagsunod sa direktiba ni President Rodrigo Duterte nga ilakip ang mga low-income families nga wala nahatagan.
Ginalauman naman sang pamunuan sang DSWD nga sa bulig sang mga partners, matapos sa mas madasig nga panahon ang payouts.
Ginkumpirmar man ni RD Espejo nga syento porsyento suno pa nga narelease sang rehiyon ang first tranche sang SAP distribution kag nakumpleto sang 50 LGUs ang payout kag nakasubmitir sang ila nga liquidations.
