Nag-upod ang mga empleyado sang Department of Social Welfare and Development ukon DSWD regional office 6 sa ginhiwat nga Black Friday protest bilang suporta kay anay DSWD Secretary Judy Taguiwalo nga gin-reject sang Commission on Appointment.
Suno kay Leo Quintilla sang DSWD 6 nga dismayado sila kag ginapakamalaut ang nangin desisyon sang CA nga pag-reject sang appointrment ni Taguiwalo sa ahensya.
Ginhatagan pagtamod ni Quintilla nga sa kapin isa ka tuig lamang sang pagpangalagad ni Taguiwalo sa DSWD, madamo ini sang napatuman nga mga pagbag-o sa ahensya kabangdanan daku gid ang ila kanugon nga wala ini gin-confirm sang CA.
Gindugang pa ni Quintilla nga luyag nila ipalab-ot sa mga katapo sang Commission on Appointments ang ila pagkadismaya kag gusto nbila mabal-an kon ano ang mga ginabasehan sang gamhanan nga Commission sa pag-confirmn sang isa ka Cabinet Secretary.
Nagapati sila nga wala gid sang kuwestyon sa qualification ni Taguiwalo gani daku ang ila kalisod nga gin-reject ini sang CA. (sspunay)
