Davao City – Giklaro sa Department of Social Welfare and Development (DSWD)-XI nga adunay limitasyon ang pagka miyembro sa Pantawid Pamilyang Pilipino Program (4Ps).
Sumala ni Sam Huelar, DSWD-XI Regional Case Management Focal sa interbyu sa city-owned radio, subay sa Section 4 sa Republic Act (RA) No. 11310, anaa lamang sa maximum period nga pito (7) ka tuig ang hatagan og ayuda sa kwalipikadong pamilya alang sa maong programa.
“So, pagka balaod niya (sa 4Ps) naa na siyay bag-ong timeline which is 7 years nalang gyod ang atoang beneficiary sa program, kay dati gina-ingon nila ‘forever gyud ‘ni si Pantawid, tagaan gyod ‘ta pirmi og cash grant ani’ but no,” tataw ni Huelar.
Aduna usay mga rason nga dili na muabot pa sa maong program duration ang benepisyaryo kung ang last monitored child sa usa ka household muabot na og 19-anyos o migradwar na sa 4Ps program.
Gawas niini, mamahimo na usab sila nga matanggal sa programa kung sila makonsidera na nga ‘non-poor’ subay sa himuong assessment o kaha sila mismo ang mag-waive na sa programa.
Panawagan usab ni Margie Cabido, Regional Program Coordinator sa DSWD-XI, mamahimong responsable ang mga benepisyaryo sa maong ayuda sa gobyerno nga nagtumong nga mahaw-as sa kalisod ang matag pamilya ug mahatagan og saktong edukasyon ang kabataan.
RadyoMaN Kirby Manzon
