Indi na makapartispar sa anuman nga government transactions partikular na sa Department of Social Welfare and Development ukon DSWD 12 ang tatlo ka mga suppliers matapos nga ginblacklist ini sang ahensya. Ini ang nangin kumpirmasyon ni DSWD 12 Regional Director Cezario Joel Espejo.
Ang tatlo ka mga suppliers ang ginalakipan sang duha ka advertising and marketing company kag isa ka furniture and office supplies nga napaslawan nga i-comply ang ginapangayo nga purchase requirements sang ahensya.
Isa sa blacklisted supplier ang Rubee Marketing nga nakabase sa Cotabato City nga wala nadeliver ang P524, 750 nga kantidad sang furniture and fixtures sang 2018 purchase order (PO).
Samtang ang QPC Advertising ang nakontrata man nga maghimo sang 2,338 ka panid sang red vest nga may logo kag himo sa brush twill fabric para sa mga Listahanan workers sang nagligad nga tuig, apang napaslawan man nga macomply ang nakasugtan sa tunga nila sang agency’s Bids and Awards Committee matapos nga ang gindeliver nga vest nga nagakantidad sang P 701,400 ang ginkambyohan sang blue thin fabric.
Ang ikatatlo naman nga supplier amo ang Marbel GEPCARS PRINTING PRESS, nga ang gindeliver ang single string advocacy notebook nga wala naman nagsunod sa nakasugtan nga double string specification nga nagakantidad sang P50, 000.
Suno kay Espejo ang nasambit nga mga suppliers ang blacklisted kag ginadumilian sa pag-intra sa tanan nga government project biddings kag procurement process sa sulod sang isa ka tuig.
Ginhatagan pa punto sang regional director nga sa idalom sang RA 9184, ang private contractors nga magbayolar sa procurement laws ang magapangatubang sang criminal kag civil liabilities, permanent disqualification sa pagpakigtransaction sa government agencies.
May-angot sini, ginaremind ni Espejo ang mga suppliers nga nagaintra sa bidding sa mga proyekto sang ahensya nga sundon gid ang nakasugtan sa bid listings.
Ang nasambit suno pa nga tikang sang pamunuan sang DSWD 12 ang kabahin sang ila nga kampanya nga mangin corrupt-free institution.
