DTI-Bukidnon, mipahinomdom sa mga konsumante sa pagsusi sa igong mga tatak pagpalit sa mga Christmas Lights

Gipahinomdoman karon sa Department of Trade and Industry (DTI)-Bukidnon ang mga konsumante sa pagsusi sa igong mga tatak kon logo nagpakita sa safety standards sa ginapalit nga mga Christmas Lights.

Sa interview sa RMN Malaybalay ngadto kang Junar Merla ang Chief sa Consumer Protection Division sa DTI-Bukidnon, gibutyag niya nga kung mga imported electrical products sama sa Christmas Lights kinahanglan nga anaay ICC Logo kon Imported Commodity Clearance.

Kung locally made usab pangitaon lang sumala pa ang certificate o logo sa Philippine Standard kon PS Mark.

Dugang pa ni Merla nga importante nga makita sa mga konsumante ang safety standards sa matag electrical product nga paliton aron na usab nga luwas kini sa paggamit ilabi na sa singabot nga kapaskuhan.

Sa pikas nga bahin, regulated na matud pa ang maong mga produkto sa DTI diin mandatoryo nilang gi-implementar ang pagsunod sa safety standards.

Pakyas nga pagsunod niini, mamahimong makadawat og notice of violation, diin posibleng makabayad og penalties ug pagkompiska sa mga sub-standards nga mga produkto.