Ilunsar sang Department of Trade and Industry South Cotabato ang “Bolante sa Baryo” program sini nga magaarangkada umpisa sa Abril 25 tubtob May 2 subong nga tuig.
Suno kay DTI OIC Provincial Director Rictoniel Reginio katuyuan suno pa sang nasambit nga programa nga dal-on ang mga essential needs kapareho sang mga prime kag basic commodities subong man agricultural products kapareho sang bugas sa mga pumuluyo sa barangay kag maminimize ang paggwa sa balay ukon sa ila nga lugar sang mga pumuluyo sa probinsya kadungan sang ginapatuman nga enchanced community quarantine kag calibrated lockdown tungod sa paandam sang COVID-19.
Sa pagplastar sang nasambit nga programa sang ahensya ginpungkuan ini sang mga LGU representatives, South Cotabato Consumers Association representative kag managers sang mga major malls sa Koronadal City.
Base sa ila nga nadesisyunan suno kay Reginio isa ka barangay sa pito ka mga banwa sa probinsya ang naidentify nila nga kadtuan nga ang sa Polomolok sa Koronadal Proper nga natalana sa Abril 25, Liberty sa banwa sang Tampakan, Brgy. Ned sa Lake Sebu, Crossing Rubber sa Tupi, Brgy. Cabudian sa Banga, San Jose Norala, Brgy. Panay sa Sto. Niño.
Lauman suno pa sang mga pumuluyo nga makabarato sila sang baklon nga mga produkto tungod mismo ang mga supplier ang magakadto sa ila nga lugar.
