Davao City – Nagpasidaan ang Department of Trade and Industry (DTI) nga adunay tulubagon ang mga nagabaligya’g overpriced face mask gumikan sa nasinatiang 2019 novel coronavirus acute respiratory disease.
Kini ang pagpaklaro ni Christopher Dalhog, Trade and Industry Development Specialist sa DTI-Davao City sa interbyu sa DXDC RMN Davao, agi’g tubag sa kahadlok sa publiko nga posibleng musaka ang presyo sa face mask.
Gibutyag sa DTI official nga adunay pagnihit sa suplay sa face mask dinhi sa syudad sa Davao, hinuon wala pay namatikdang pagsaka sa presyo partikular na sa N95 ug surgical face mask.
“Naa mi napangutana nga mga regular nga customers wala may lihok sa prices pero sa supply aminado ang mga establishments or ang pharmacy nga maski sa ilang supplier nagalisod og deliver sa ilaha,” saysay ni Dalhog.
Nasayran nga gikabalak-an sa mga Dabawenyo ang ilang kasinatian diin naglisod na sila’g palit og face mask sa mga tindahan sa ilang lugar.
RadyoMaN Kirby Manzon
