DTI XI: Price monitoring sa lagyong lugar malisod

27

Davao City – Giangkon ni DTI XI Regional Director Bel Ambi nga maglisud sila sa pagmonitor sa mga presyo sa batakang palaliton sa mga negosyante nga nahimutang sa mga lagyo ug hilit na nga mga barangay.

Sumala ni Ambi nga ang nasinatiang kalit nga pagsaka sa presyo sa mga batakang palaliton resulta sa kalit nga pag abnormal sa sitwasyon tungod sa COVID-19 pandemic diin mitaas ang demand sa mga batakang palaliton.


Matud niini nga usa sa ehemplo ang supply sa bugas diin ang mga dagkong rice traders dinhi sa syudad sa Davao naga supply usab sa mga sikbit nga mga probinsya ug mga rehiyon rason nga munihit ang supply niini.

Gidugang sa regional director nga ang procurement sa mga LGU sa mga basic commodities aron ipanghatag isip relief assistance sa mga kabaranggayan nga maoy nakapasamot sa pag ubos sa supply.

Gipaniguro ni Ambi nga padayon nilang ginamonitor ang mga dagkong mga palengke, supermarkets ug mga grocery stores aron masiguro nga nasunod ang SRP sa mga batakang palaliton.

“Kung naay over pricing sa supermarkets ug big grocery stores mao na sila ang atong gina isyuhan ug notice of violation. Karon didto sa mga retail nga gagmay ginakunsider na namo tungod sa gasto nila sa transport. Peru kun adunay reklamo pwedi gihapon kay tan awon nato kun justifiable o reasonable ang pag taas sa presyo” matod sa DTI XI regional director.

RadyoMaN Erin Lumosbog




Facebook Comments