iFM Laoag – Nagsagaba ti head injury dagiti dua a lalaki kalpasan a nadisgrasiada iti motorsiklo a naglugananda iti National Highway a paset Brgy. Bubon Burgos, Ilocos Norte idi rabii 7:20 pm.
Nabigbig ti nangiturong iti motorsiklo a ni Raymond Curimao, addan iti legal a tawen, naasawaan, maysa a construction worker ken iti inlubbonna a ni Charlie Semanero y Curimao, addan iti legal a tawen, awanan ti asawa ken agpadpada a residente iti Brgy. Ablan iti nadakamat nga ili.
Segun kenni Pol. Corporal Gerald Toledana iti imbestigador ti aksidente, agpapaabagatan a direksion dagiti biktima idin ta makadanunda iti asideg ti Barangay Hall a kurbaan ket ditoyda a napukawan ti kontrol, rason a naslide ken nagsagabada nga agpadpada ti head injury, partikular iti pispis wenno iti akin kannawan a matada ken sumagmamano a gasgas ti bagbagida.
Insigidada met a nakapagresponde dagiti otoridad ken naikkan dagiti biktima ti first aid sakbayda a naitaray iti ospital Kinumpirmaran pay ti imbestigasdor iti daytoy a pasamak a positibo dagiti dua a nakainomda ti arak ken maululawda paylaeng idi maalaanda ti personal nga impormasion.
Kabayatanna, agtultuloy met paylaeng ti imbestigasion dagiti otoridad iti daytoy a pasamak. (Joe Anne Agustin, RMN News)
