Dua a motorista, nagdinungpar iti ili ti Sarrat

428

iFM Laoag – Nasugsugatan dagiti dua a motorista kalpasan ti panagdinnungparda iti National Highway a paset ti Brgy. 22 San Cristobal, Sarrat, Ilocos Norte idi rabii Pebrero 15, 2020.

Nabigbig dagiti dua a motorista nga isuda: Andres Jr. Ramos y Ballesteros, agtawen ti 58, naasawaan, maysa a tricycle driver ken residente iti Brgy. 19 Sto. Tomas iti ili ti Sarrat, iti inturongna a maris nangisit a Honda TMX 155; Rocky Ramos y Agustin, agtawen 19, awanan ti asawa, maysa a pintor ken residente iti Brgy. Bagut iti ili ti Dingras, iti inturongna a Honda TMX 125 nga agmaris nalabbaga.


Segun kenni Pol. Staff Sergeant Mark Anthony Raciles iti PNP Sarrat, agpapalaud a direksion ni Ballesteros a nagovertake iti sarsaronoenna a lugan, nu sadinno ti panagovertakena ket isu’t rason a nagdinnungparda kenni Ramos a kasinnabatna.

Nagsagaba ni Ramos iti nakana a sugsugat ti bagbagina ken naitaray iti Governor Roque B. Ablan Sr. Memorial Hospital idin to a ni Ballesteros ket nagpasar met ti sangkabassit a sugsugat ken naitaray met iti Dingras District Hospital.

Kabayatanna, dagiti dua a motorista ket saanda a nakainom ti arak idi napasamak ti aksidente, saanda a maibilang iti listaan ti drug surrenderer ken saanda a wanted persons.

Iti agdama agtultuloy ti imbestigasion dagiti otoridad ken manamnama ti panagsarita dagiti dua a kampo inton makaruarda iti ospital. (Joe Anne Agustin, RMN News)
[Photo Credits: Markgaile Medrano]

Facebook Comments