Kadayawan Festival na usab! Busa, daghang turista na sab ang muduaw niining atong dakbayan sa Davao aron masaksihan ang maadunahang kultura sa Mindanao.
Aron kumpleto ang Kadayawan, ania ang uban sa mga iladong lugar nga angay’ng duawon sa Davao.
Kung mahilig ka sa mga landscaped parks ug magbaktas-baktas atubangan sa Davao Gulf, kini ang para nimo – Magsaysay Park. Sa gawas niini makita ang Magsaysay Fruit Stand kung asa mapalit ang sikat nga durian ug pomelo nga pwedeng pasalubong sa inyong pamilya. Ang People’s Park sab ang usa sa sikat nga suruyanan sa mga batan-on ug mag-pamilya. Diri makita ang mga statuwang hinimo ni Kublai Milan nga nagapakita sa maanindot nga kultura sa Mindanao.
Para usab sa mga ‘animal lovers’, adunay mga sikat nga animal parks sa Dabaw na siguradong inyohang ma-enjoy. Gikan sa klase-klaseng langgam ug alibangbang, mga buwaya ug mga bitin, ug ang giilang King of Birds, ang Philippine Eagle. Siguradong malingaw ka sa mga exotic nga mga hayop nga makita sa mga animal parks.
Sa mga mahilig usab ug extreme adventures, dili magpaiwit ang Davao. Naay mga nature parks para sa mga taong gusto makasinati ug ‘once in a lifetime experience’. Naay zip lining, biking, mountain climbing ug uban pa na ma enjoy sa tibuok pamilya.
Kung gikapoy naka sa mga shopping malls, traffic ug ka-busy sa syudad ug gusto nimo mag-relax sa beach, pinaka maayong adtuan ang Island Garden City of Samal nga ginganlang “the countryside of Davao”. Sa kapin saysenta (60) ka mga resorts, makapili usab ka kung unsa ang pasok sa budget. Sa mga mahilig ug water sports, pwedeng mag diving ug snorkeling sa Talicud Island. Kulang ang trip sa Samal kung dili i-experience mag Island hopping ug adtuan and mga gagmayng isla sama sa Wishing Island, Vanishing Island, Malipano Island, Diaz Island ug Liguid Island. Ubanon na ang pamilya ug barkada para masinati ang exciting trip sa Samal Island.
Kung hilig nimo ang pagkaon ug street food, adtua na ang Roxas Night Market. Gikan sa barbecue, kwek-kwek, buchi, balut, ug uban pa, mabusog naka sa baratong kantidad. Ang Roxas Night Market usab ang sentro sa ukay-ukay sa Dabaw. Kung nabati kag kakapoy sa tibuok adlaw nga pag-laag, pwede usab maga-massage ug mag-relax.
Tuod nga daghang destinasyon ang pwedeng maduawan sa Dakabayan sa Dabaw. Ug kini gina-preserba ug presenta ang natural nga kaanindot sa Mindanao.
