Dugang fuel subsidy gipaboran sa Dabawenyong drivers

Davao City – Tungod sa nagpabiling taas nga presyo sa petrolyo sa syudad sa Davao, angayan lang matud pa nga adunay dugang fuel subsidy ang mga driver.

Kini ang sagad reaksyon sa mga Public Utility Vehicle (PUV) Drivers atol sa pakighinabi sa DXDC RMN Davao.

Sumala ni Jose Llawan, PUJ Driver nga dunay rotang Maa, pabor siya nga dungagan pa ang subsidiya tungod sa mga panahon nga musaka ang presyo sa petrolyo apan gamay ra ang rollback.

Dugang niini nga mas kinahanglan nila ang nahisgutan ilabi na nga wala pa gipatuman ang P1.00 nga diskwento alang sa mga PUJ driver nga magpatubil sa pampublikong sakyanan.

Samtang, sugyot usab ni Mel June Rey, PUV driver, kung aduna may dugang fuel subsidy nga ihatag sa gobyerno, mas maayo nga i-diretso og hatag sa mga driver ug dili sa mga operator aron malikayan ang pagduda ug reklamo.

Karong adlawa, Nov. 8, 2022, ipatuman ang price adjustments sa petrolyo diin ang Gasoline mag-increase og P1.40/liter samtang dunay rollback nga P0.50/liter sa presyo sa Diesel ug P0.35/liter sa Kerosene.

RadyoMaN Don Pulayao