Target karon sang Department of Tourism nga magdugang pa sang direct flights halin sa nagkalain-lain nga key cities sang South Korea pakadto sa Pilipinas.
Suno kay DOT secretary Bernadette Romulo-Puyat, nga siya ang nagpirma sang tourism cooperation sa gobyerno sang South Korea, luyag sini nga masigurado ang pagpasanyog sang tourism ties sa tunga sang duha ka pungsod.
Sa karon suno kay Puyat, 14 ka dugang nga flights ang operational padulong sa Pilipinas halin sa SoKor lakip na diri ang Daegu-Kalibo-Daegu, Incheon-Bohol-Incheon, kag Muan-Clark-Muan.
Dugang pa ni Puyat nga isa ini sa makabig nga rason kun ngaa dako nga source sang bisita para sa Pilipinas ang Korea sandig sa January to September 2019 report sang DOT.
Naglab-ot sa 1.4 million Korean tourist arrivals ang na-record sa nasambit nga period.
