General Santos City— Dako ang pagpasalamat sa Gensan City Police Office ngadto sa lokal nga panggamhanan alang sa dugang walo ka mga patrol cars ug pulo ka m4 rifles.
Sumala kang Police Col. Raul Supiter, City Director sa GSCPO nga tungod sa padayong suporta sa lokal nga panggamhanan ngadto sa kapulisan, mas madasig sila sa paghimo sa ilahang trabaho hilabi na sa pagbantay sa siguridad.
Saysay niini nga nauna na silang nagpahigayon ug panagpulong uban ang mga kapitan sa barangay ug aduna na sila’y nakit-ang solusyon sa mga street crimes nga nagakahitabo.
Pag-angkon ni Police Col. Supter nga aduna gyu’y mga nagakahitabong krimen sa dakbayan apan aduna usab uban nga gina-post lang sa social media ug walay basihan gumikan wala may na-blotter sa mga police station.
Sama nalang matud pa sa mga nagkatag nga adunay mga kabatang ginapang-kidnap, gumikan wala matud pa silay nadawat nga unsa mang report kabahin niini.
Sumala niya nga aron nga mahatagan ug pagtagad ang mga street crimes, aduna na silay gihimo nga mga bag-ong stretehiya sa pagbantay sa siguridad.
