Dugang security forces i-deploy sa Kadayawan Festival

Davao City-Nagdugang og kapin 500 ka mga personahe sa pagbantay sa seguridad sa nagkadaiyang aktibidades sa ika-32nd Kadayawan Festival dinhi sa syudad sa Dabaw.

Kini ang sigun ni Police Regional Office kun PRO-11 acting spokesperson Senior Inspector Catherine dela Rey atol sa interview sa DXDC RMN Davao diin nagsugod na sila og deploy sa 200 ka mga pulis gikan sa regional police lakip na ang kapin 300 ka mga police trainees sa mga gihan-ay nga kalihokan sa nasangpit nga festival.

Dugang ni dela Rey, andam na ang kapulisan kauban ang ubang security forces sa umaabot nga dakong selebrasyon.


“All set na, nakaprepare, nagstart na og deploy sa nagkadaiyang activities nga gihan-ay sa Kadayawan Festival 2017” sigun ni PRO XI spokesperson dela Rey.

Sa pikas bahin, temporaryong sarad-an ang pipila ka mga dalan sa syudad sa Dabaw karong Agosto 19 alang sa Kadayawan Street Parade o Indak-Indak sa Kadayawan.

Ning bag-ohay lang, nagpagula og abiso ang lokal nga panggamhanan sa dakbayan sa Dabaw sa mga dalan nga temporaryong dili paagian karong Agosto 19.

Dili paagian og sakyanan ang tibuok San Pedro Square tungod sa maong lugar i-muntar ang Kadayawan Dome o ang mahimong showdown area sa mga contingents sa Indak-Indak.

Ang mga mag gikan sa norte nga bahin gi-abisohan nga muagi sa alternate routes: J.P Laurel Ave-Quirino Avenue-Mcarthur Highway, J.P Laurel Avenue- R.Castillo St.-Leon Garcia Street-Quezon Boulevard,- Quimpo Boulevard- Mcarthur Highway., J.P Laurel Avenue-Cabaguio-L. Garcia St.- Quezon Boulevard- Quimpo Boulevard, Mcarthur Highway.
Samtang ang alternatibong mga ruta alang sa mga mag gikan sa sur nga bahin: Mcarthur Highway-Quirino Avenue-Jose P. Laurel Avenue; Mcarthur Highway- Magallanes St.-Quezon Boulevard; Mcarthur Highway-Sandawa Road-Quimpo Boulevard; Mcarthur Highway-Quimpo Boulevard-Quezon Boulevard.

Ang temporary road closure sa San Pedro Square mag sugod karong Agosto 17-18 sa alas syete sa buntag hangtud alas tres sa hapon (7AM-3PM). Sarado sab kini sa adlaw sa Indak-Indak karong Agosto 19.

Samtang temporaryong sarad-an ang dalang Palma Gil (gikan kanto Legaspi Street padulong Ponciano Street) karong Agosto 17-20, alas kwatro sa hapon hangtud ala una sa kadlawon (4PM-1AM) alang sa Kaondayawan/Food Market And Music Nights.

Kasamang Merle Comidoy

Facebook Comments