Dugang tabang pinansyal sa mga indigent na Senior Citizens gikatakda na ipanhatag!

Plastado na og andam na ipan-apod apod sa mga Senior Citizen beneficiaries sa syudad an dugang na ayuda o karajawan gikan na sa gobyerno koman umaabot na Sabado sanan Domingo, Oct 20 ug 21, sa may City Gymnasium, ini an tagkumpirmar kagahapon ni Ms.Gloria Salvador, an Social Worker nan City Social Welfare and Development Office. Tagpasabot ni Salvador na an mga indigent Senior Citizen lamang na nalista sa 1st quarter an una anay makadawat sa dugang na karajawan na cash, sanan kinahanglan makipagkooperar o koordinar sa mga barangay officials, para mahibaw-an kun uno sila na adlaw mareleasan, Sabado ba o Domingo. Dugang pa ni Salvador na nisugot na an LandBank of the Philippines, na tugutan an pamilya o representative nan mga senior citizen sa pagkuha nan ila dugang na karajawan na mokantidad sa P2 000, para masiguro na dili na sila mahago sa pagbyahe gikan sa mga nagkalain-laing Barangay sa syudad. Kon dili sab gani makuha an ila dugang na ayuda o tabang pinansyal koman Sabado sanan Domingo, pwede pa nila ini makuha sa sunod na schedule nan ila opisina. Pasabot pa ni Salvador na dili anay tanan senior citizen an makadawat sa dugang na karajawan, kun dili an mga nalista anay sa 1st quarter koman na tuig, samtang an nalista para sa 2nd quarter ug 3rd quarter an kinahanglan pa na magpaabot sa dili ra isab madugay.Sa kasamtangan may listahan an DSWD na 4, 289 ka mga senior citizen beneficiaries.(RadyoMaN Winston Ensomo)

Facebook Comments