Davao City – Gikatakdang magpahigayon karong Lunes, November 4, 2019 og session ang City Disaster Risk Reduction and Management Council (CDRRMC) aron pa-aprubahan sa City Government of Davao ang laing tabang alang sa mga biktima sa linog sa mga areas sa Mindanao.
Sa interbyu sa DXDC RMN Davao kang Alfredo Baluran, head sa CDRRMC, gibutyag niini nga ang maong session himuon aron mag-apruba sa laing tabang nga ipaabot ug itunol sa mga nabiktima sa linog.
“Karong Lunes, mag session napud mi para aprubahan namo para sa ubang lugar. Pag ma-approve na, ihatud na pud namo,” saysay ni Baluran.
Gibutyag ni Baluran nga napaabot na sa City Government of Davao ang P300,000 matag lugar sa Bansalan, Matan-ao, Magsaysay ug Tulunan diin gikuha ang maong pondo sa quick respond fund sa disaster.
Gawas sa tabang pinansyal, adunay usay ipang apod-apod nga relief goods nga i-prepara sa Office of the City Mayor kauban ang City Social Services and Development Office (CSSDO) ngadto sa mga biktima sa kalamidad.
RadyoMaN Kirby Manzon
